लाज ढाक्न पूर्व उपकुलपति डा. संगीताको खण्डन

काठमाडौं । राप्ती स्वास्थ्य विज्ञान प्रतिष्ठानकी विवादास्पद पूर्व उपकुलपति डा. संगीता भण्डारीले आफूले गरेको कर्तुत ढाकछोप गर्न  स्वास्थ्य लाइभले प्रकाशित गरेको समाचारको खण्डन गरेकी छन् ।

जग्गा भाडा लगाउनेदेखि स्वास्थ्य उपकरण खरिदमा करोडौं रुपैयाँ घोटलाको आरोप खेपेकी उनले घरमा पालेको कुकुरको बिल समेत प्रतिष्ठानलाई तिराएको बिल स्वास्थ्य लाइभले सार्वजनिक गरेको थियो ।

गत पुस ५ गते स्वास्थ्य लाइभले ‘डा. भण्डारीको कुकुर उपचार खर्चसमेत प्रतिष्ठानको जिम्मामा’ शीर्षकमा समाचार सार्वजनिक गरेको थियो ।  स्वास्थ्य लाइभले राप्ती स्वास्थ्य विज्ञान प्रतिष्ठानबाट प्राप्त गरेको कागजातमा घरको कुकुरलाई उपचार गरेको ४ सयको बिल प्रतिष्ठानको नाममा काटिएको स्पष्ट देख्न सकिन्छ ।

पूर्व उपकुलपति डा. भण्डारीले उक्त बिलसहितको समाचार लेखेकोप्रति आफ्नो गभ्भीर ध्यानाकर्षण भएको बताएकी छन् । आफ्नो नाम जोडिएर छापिएको समाचार चरित्र हत्या गर्ने उद्देश्यले प्रकाशित भएको उनको बुझाई छ ।  ‘हुँदै नभएको कुरामा नियोजित कसैको उक्साहटमा लागेर आएको समाचारमा कुनै सत्यता छैन ।’, उनको खण्डनमा उल्लेख छ ।

तत्कालिन स्वास्थ्यमन्त्री दिपक बोहराको जोडबलमा नियुक्ति पाएकी उपकुलपति डा. भण्डारीको चार वर्षे कार्यकाल नै विवादास्पद र उपलव्धिबिहीन बनेको प्रतिष्ठानका कर्मचारीहरूको आरोप छ ।

कुकुरको उपचार समेत प्रतिष्ठानको ढुकुटीबाट गरेर राज्य कोषको चरम दुरुपयोग गरेकी भण्डारीको खण्डनलाई स्वास्थ्य लाइभसँग सुरक्षित रहेको प्रतिष्ठानको नाममा काटिएको कुकुरको बिलले आफैं जवाफ दिएको छ ।