प्रचण्डले बुस्टर डोज खोप लगाएको देउवाको मुखबाट फुत्किएपछि…

काठमाडौं । प्रधानमन्त्री शेरबहादुर देउवाको मुखबाट माओवादी केन्द्रका अध्यक्ष पुष्पकमल दाहाल ‘प्रचण्ड’ले कोभिड-१९ विरुद्धको बुस्टर डोज खोप लगाएको कुरा फुत्किएको छ ।

प्रधानमन्त्री कार्यालय, स्वास्थ्य तथा जनसंख्या मन्त्रालयलगायतका निकायका उच्च अधिकारीहरूसँगको बैठकमा प्रधानमन्त्री देउवाले प्रचण्डले बुस्टर डोज खोप लगाएको बताएका हुन् ।

प्रधानमन्त्री कार्यालयका एक उच्च अधिकारीकाअनुसार कोरोनाको बुस्टर डोज खोप लगाउने र यसले कोभिड-१९ नियन्त्रण तथा रोकथाममा देखाउने प्रभावकारिताको विषयमा कुरा हुँदै गर्दा प्रधानमन्त्री देउवाले प्रचण्डले बुस्टर डोज लगाएको थिए त कोभिड संक्रमण भयो त भनेका हुन् ।

प्रधानमन्त्री देउवाको मुखबाट उक्त कुरा फुत्किएपछि स्वास्थ्यका अधिकारीहरु मुखामुख गरेका थिए भने एकछिन सन्नटा छाएको ती अधिकारीले स्वास्थ्य लाइभलाई सुनाए ।

प्रचण्डलाई कोभिड-१९ को संक्रमण भइसकेपछि देउवाले बुस्टर डोजले पनि कोरोना संक्रमण हुनबाट नरोक्ने रहेछ भन्ने उदाहरण दिन त्यो प्रसंग कोट्याएको प्रधानमन्त्री कार्यालयका अधिकारीहरुको भनाइ छ ।

सरकारले बुस्टर डोज खोप लगाउने निर्णय नगर्दै कतिपयले बुस्टर डोज खोप लगाइसकेका रहेछन् भन्ने कुरा प्रचण्डले बुस्टर डोज खोप लगाएको प्रकरणबाटै पुष्टि हुन्छ ।