जेष्ठ नागरिकका लागि छुट्टै अस्पताल बनाउने बाटो खुल्यो

काठमाडौं । सरकारले जेष्ठ नागरिकका लागि छुट्टै अस्पताल बनाउने भएको छ । स्वास्थ्य तथा जनसंख्या मन्त्रालयको प्रस्तावमा मन्त्रिपरिषद्ले जेष्ठ नागरिक अस्पताल बनाउन सैद्धान्तिक सहमति प्रदान गरेपछि जेष्ठ नागरिकका लागि छुट्टै अस्पताल बन्ने बाटो खुलेको हो ।

स्वास्थ्य तथा जनसंख्या मन्त्रालयले डा. राधिका थपलियाको संयोजकत्वमा पायक पर्ने स्थानमा अलग्गै विशिष्टकृत जेष्ठ नागरिक अस्पताल सञ्चालन गर्ने सम्बन्धनमा अध्ययन गरी प्रतिवेदन पेश गर्न कार्यदल गठन गरेको थियो । उक्त कार्यदलले दिएको रिपोर्टका आधारमा जेष्ठ नागरिक अस्पताल निर्माणको प्रक्रिया अघि बढ्ने छ । स्वास्थ्य तथा जनसंख्यामन्त्री विरोध खतिवडाका अनुसार जेष्ठ नागरिकको सम्मानका लागि बनाउन लागिएको जेष्ठ  नागरिक अस्पताल धादिङ, चितवन, मकवानपुर, सिन्धुली, काभ्रे लगायतका जिल्लामा बन्ने  गरी तत्काल प्रक्रिया अघि बढाउने तयारी छ ।

मन्त्रिपरिषद्ले जेष्ठ नागरिक अस्पताल बनाउने बाटो खोलेसँगै मुलुकमा फेरि एउटा अस्पतालको संख्या थपिने भएको छ ।