सबै जनताको पहुँचमा स्वास्थ्य सेवालाई पुर्याउने प्रयासमा सरकार लागिरहेको छ : मन्त्री गिरी

काठमाडौं । स्वास्थ्य तथा मन्त्री पदम गिरीले सबै जनताको पहुँचमा स्वास्थ्य सेवालाई पुर्याउने प्रयासमा सरकार लागिरहेको बताएका छन् ।

‘स्वास्थ्य क्षेत्रभित्र धेरै समस्या छन् । गरिब विपन्न जनताले अझै पनि गुणस्तरीय सेवा पाइसकेका छैनन् । एउटा मानिस बिरामी हुँदा महँगो शुल्क तिरेर उपचार गर्नुपरेको छ ।” उनले भने ।

नियमित खोप तथा दादुरा–रुबेला प्रकोपको तयारी र प्रतिक्रियाका लागि परिवार कल्याण महाशाखाले आयोजना गरेको  राष्ट्रिय समिक्षा कार्यक्रममा बोल्दै मन्त्री गिरीले सबैको पहुँचमा स्वास्थ्य सेवालाई पुर्‍याउनका लागि जनशक्ति र पूर्वाधार थपिने बताए ।

‘जनताकाे स्वास्थ्यमा आधारभूत परिवर्तन आयो है भन्ने महसुस गराउनेगरी हामी काम गर्छौ,’ उनले भने ।

‘खोपका सन्दर्भमा आम जनता र समुदायको धारणा के छ भन्ने विषयमा राम्रोसँग अध्ययन गर्नुपर्यो । ती समुदायमा हाम्रो स्वास्थ्यकर्मी र जनप्रतिनिधि साथीहरुलाई ठूलो रुपमा परिचालन गर्ने ठोस योजना बनाउनुपर्छ,’ उनले भने,‘प्रत्येक घर र व्यक्तिसम्म  यो अभियानलाई लैजान हामी चुक्न हुँदैन ।’

हरेक बच्चाको अभिलेख डिजिटल प्रणालीभित्र राख्नुपर्ने उनले बताए ।

‘जन्मेको बच्चाको अभिलेख अस्पतालमा हुने भइहाल्यो । तर, अझै पनि गाउँघरमै सुत्केरी गराउने चलन पनि छ । जसकारण, बच्चाहरु खोप लगाउन छुटेको अवस्था छ ।  नेपालमा हरेक बच्चा जन्मेको सूचना स्वास्थ्य प्रणालीमा हुनुपर्यो,’ उनले भने,‘ ‘ऋण तिरेन भने बैंकले बारम्बार फोन गर्छ । किनकी, त्यहाँ डिजिटल प्रणालीमा सबै अभिलेख हुन्छ । पहिलो खोप लगाएको एउटा बच्चाले  दोस्रो खोप लगाएन भने तपाईको बच्चा किन आएन भनेर अभिभावकलाई फोन गर्न के गाह्रो छ ?’

उनले खोप अभियानलाई सफल बनाउन जनप्रतिनिधि, युवा समूह तथा संघ–संस्थाहरुको महत्वपूर्ण भूमिका रहने बताए ।

‘स्थानीय तह २० वर्षसम्म कर्मचारीले चलाएको अवस्था थियो । अहिले त जनप्रतिनिधि छन् । नगर/गाउँसभा बस्छ । खोपको एजेन्डा पनि त्यहाँ राख्न लगाउनुस्  न,’ सरोकारवालाहरुलाई उनले भने,‘हाम्रा समूहहरु छन्, युवा समूह, विभिन्न संघ संस्था छन् । त्यहाँ समन्वय र छलफल गर्ने गरौं, मुलकलाई पूर्ण खोपयुक्त बनाउन लागौं ।’

खोप अभियानमा शतप्रतिशत सफलता हासिल गर्नका लागि सबै मिलेर अघि बढ्नुपर्ने उनले बताए ।