लोमसका मालिक पाण्डेद्वारा एफएनसीसीआईको कोषाध्यक्षमा उम्मेदवारी

काठमाडौं । लोमस फार्मास्यूटिकल्समा मालिक प्रवलजंग पाण्डेले नेपाल उद्योग वाणिज्य महासंघ (एफएनसीसीआई)को कोषाध्यक्षमा उम्मेदवारी दिएका छन् । उक्त संस्थाको कार्यसमिति सदस्य समेत रहेका उनले कोषाध्यक्षमा उम्मेदवारी दिएका हुन् ।

महासंघको गत चैत २९ र ३० गते भएको ५७औं वार्षिक साधरणसभामा एसोसिएट तर्फबाट पाण्डे ११२८ मतसहित कार्यसमिति सदस्यमा निर्वाचित भएका थिए । उनले नवनिर्वाचित वरिष्ठ उपाध्यक्ष अञ्जन श्रेष्ठको टिमबाट कोषाध्यक्ष पदमा उम्मेवारी दिएका हुन् ।

कोषाध्यक्ष पदका उम्मेदवार पाण्डे सफल उद्यमीको रुपमा परिचित छन् । उनको औषधि, पर्यटन, बैंक तथा विमा लगायतको क्षेत्रमा लगानी रहेको छ। कोषाध्यक्ष पदमा पाण्डेसँगै, गोपाल खनाल र सन्दीप गेडिया र निरक केसी उम्मेदवारी दिएका छन् । महासंघको कोषाध्यक्षको निर्वाचन रोचक हुने देखिन्छ ।