कहाँ हरायो अनामनगरस्थित ओपीएससँगैको चिल्ड्रेन पार्क ?

काठमाडौं । अनामनगरस्थित अक्सिडेन्टल पब्लिक स्कूल (ओपीएस)सँगैको सरकारी जग्गामा बनेको चिन्ड्रेन पार्क अहिले हराएको छ । काठमाडौं महानगरपालिकाको १० लाख बढी लगानीमा करिब १५ वर्ष अगाडि बनाइएको उक्त चिल्ड्रेन पार्क भूमाफियाले कर्लप्पै खाइदिएका छन् ।

काठमाडौं महानगरपालिका वडा नम्बर २९ स्थित अक्सिडेन्टल पब्लिक स्कूलको प्रशासनिक भवनसँगै रहेको साविक कित्ता नम्बर ९ को १ रोपनी ६ आना जग्गामा बनेको उक्त पार्क अहिले देख्न सकिँदैन । तत्कालीन मानव कुमार नेपाल नेतृत्वको सरकारले चन्द्रबहादुर थापा र चन्द्रकुमारी थापालाई गुहेश्वरी ढल निकासमा परेको जग्गाको सट्टाभर्नामा उक्त पार्कको १ रोपनी ६ आना जग्गा दिइएको थियो । तर, सामाजिक विकास समाजलगायत स्थानीयले पार्क मासेर नूनसँग सुन साट्न पाइँदैन भन्दै विरोध जनाएपछि मन्त्रिपरिषद्ले फेरि उक्त जग्गा नेपाल सरकारकै नाममा फिर्ता ल्याउन बाध्य भयो ।
थापा दम्पतिलाई कपनमा जग्गा दिएर अनामनगरस्थित पार्कको जग्गा पुनः सरकारी गरिए पनि ८ आना जग्गा गायब पारियो । पार्कको १ रोपनी ६ आना जग्गामध्ये ५ आना जग्गा हरिप्रसाद गिरी र ३ आना जग्गा दशनारायण महर्जनको नाममा पुग्यो । पार्क भत्काएर महानगरपालिकाको लगानीमा निर्मित सामान बेपत्ता बनाइयो । वडाको सिफारिसमा महर्जनले त ५ तले भवन नै बनाउने नक्सा पास गरे । सामाजिक विकास समाजले निकै मेहनत गरेर उक्त नक्सा बदर गराउन सफल भयो।

फेरि सरकारी जग्गा संरक्षण अभियान्ता, सामाजिक विकास समाज र अख्तियार दुरुपयोग अनुसन्धान आयोगको संयुक्त प्रयासमा फेरि १ रोपनी ६ आना जग्गा नै नेपाल सरकारको नाममा कायम भयो । साबिक धोबीखोलाको उक्त जग्गा गिरी र महर्जनको नाममा पुग्नुले उनीहरू निकै ठूला भूमाफिया हुन भन्ने देखाउँछ । यो चिल्ड्रेन पार्क खानेविरुद्ध काठमाडौं महानगरपालिकाका प्रमुख बालेन शाहले विशेष एक्सन लिनुपर्छ ।

अक्सिडेन्टल पब्लिक स्कूलले विगत २५ वर्षदेखि कित्ता नम्बर १० को १ रोपनी १ आना साविक धोबीखोलाको सरकारी जग्गा हडप्दै आएको थियो । त्यस्तै ८ आना धोबीखोलाको जग्गा दुषित दर्ता गराएको थियो । त्यो जग्गा पनि समाजिक विकास समाज र सरकारी जग्गा संरक्षण अभियान्ताहरुको संयुक्त पहलमा सरकारकै नाममा फिर्ता आइसकेको छ ।
काठमाडौं महानगरपालिकाको सहयोगमा कित्ता नम्बर ८ मा रहेको १ रोपनी १ आना जग्गामा रुख रोपेर हरियाली प्रवर्द्धन गरिएको छ । त्यहाँ मैतीदेवी, घट्टेकुलो, अनामनगर र बानेश्वरका ५० बढी युवाहरू प्रत्येक बिहान ब्याडमिन्टन खेल्दै आएका छन् । तर, उक्त ठाउँ मासेर काठमाडौं महानगरपालिकाको वडा नम्बर २९ ले वडा भवन बनाउन खोजेको छ ।

स्थानीय र खेलाडीहरूको माग भने चिल्ड्रेन पार्क मासेर भूमाफियाले खाएको बीचको १ रोपनी ६ आना जग्गामा अन्डर ग्राउण्ड पार्किङसहित वडा भवन र स्वास्थ्य भवन बनाएर वरिपरीका जग्गामा खुला पार्क बनाउनुपर्ने रहेको छ । तर, भूमाफियाको डिजाइनमा हरियाली प्रवर्द्धन गरिएको ब्याडमिन्टन मैदानमा वडा भवन बनाउन खोजिएकोमा स्थानीयको आरोप र विरोध छ ।
वडा भवन दमकल छिर्न सक्ने भएकाले बीचमा रहेको ९ नम्बरको १ रोपनी ६ आना जग्गा उपयुक्त हुने समाजिक विकास समाजले मेयर शाहलाई सुझाव दिएको छ ।
काठमाडौं महानगरपालिकाका मेयर शाहले ३ वटै जग्गाको फिल्ड हेरेर वडा भवन बनाउने विषयमा निर्णय लिइने स्थानीयहरूलाई आश्वासन दिएका छन् । स्थानीयहरू मेयर शाहबाट न्यायपूर्ण र उचित निर्णय हुने अपेक्षामा देखिन्छन् ।

अदालतको फैसला र कानुनको पालना गर्ने सन्दर्भमा काठमाडौं महानगरपालिकाका प्रमुख शाह अरुभन्दा धेरै अगाडि रहेका छन् । काठमाडौं महानगरपालिकाले पनि वडा भवन निर्माणका लागि उक्त जग्गा मन्त्रिपरिषद्बाट निर्णय गराएर प्राप्त गर्दा राम्रो हुने देखिन्छ । यतातर्फ पनि मेयर शाहले ध्यान दिन उपयुक्त हुन्छ ।

अन्य स्थानीय तहले पनि प्रशासनिक भवन बनाउन मन्त्रिपरिषद्बाट निर्णय गराएर सरकारी जग्गा प्राप्त गर्दै आएका छन् । सरकारी जग्गा लिजमा दिने कार्यनीति,२०७९ मा यो सम्बन्धी व्यवस्था छ ।

जिल्ला प्रशासन कार्यालय, भूमि व्यवस्था, सहकारी तथा गरिबी निवारण मन्त्रालयको हुँदै मन्त्रिपरिषद्ले निर्णय गरेर स्थानीय तहलाई भवन बनाउन जग्गा दिँदै आएको अहिलेसम्मको अभ्यास छ । तर, सरकारी जग्गामा वडा भवन बनाउँदा काठमाडौं महानगरपालिकाले त्यो प्रक्रिया पूरा गरेको देखिँदैन । कानुनी राज्य र कानुन बमोजिम शासन हुनुपर्छ भन्ने मान्यता राख्ने मेयर शाहले यो विषयमा ध्यान दिनैपर्छ ।