गाँजालाई वैधानिक गरे नेपालमा कृषि क्रान्ति हुन्छ : अधिकारीहरू 

काठमाण्डौं । नेपालमा गाँजालाई वैधानिकता गरे देशमा कृषि क्रान्ति हुने अधिकारीहरूले बताएका छन् । “नेपालमा गाँजाको वैधानिकीकरण – सबैभन्दा हानिकारक लागूऔषधको सबैभन्दा उपयोगी यात्रा“ विषयक अन्तरक्रिया कार्यक्रममा सहभागीहरूले गाँजालाई वैधानिक गरे देशलाई आर्थिक तथा कृषि क्षेत्रमा ठुलो फाइदा पुग्ने बताएका हुन् । 

पूर्व स्वास्थ्य तथा जनसङ्ख्यामन्त्री शेरबहादुर तामाङले प्रस्तावित गाँजा विधेयक अगाडि नबढाएर गम्भिर गल्ति गरेको बताए । पूर्व कानुनमन्त्री समेत रहेका उनले गाँजा विद्येयकलाई गरिब र गरिब पक्ष बनाउने काम भएको स्पष्ट पारे । गाँजाको वैधानिकीकरणले नेपालमा कृषि क्रान्ति ल्याउन सक्ने तामाङको दाबी छ । 

उनले थपे, “निजी गाँजा विधेयक २०७६ मा संसद्मा प्रस्तावित भए पनि देशमा गाँजाको सम्भाव्यता अध्ययनका लागि आगामी आर्थिक वर्षको योजनामा बजेट सुरक्षित गर्ने सरकारको सफल प्रयासप्रति म धेरै आशावादी र आभारी छु ।” हाल नेपाल स्वास्थ्य अनुसन्धान परिषद्ले गाँजाको विभिन्न औषधि बन्ने भन्दै अध्ययन अनुसन्धान गरिरहेको छ । 

राष्ट्रिय स्वतन्त्र पार्टीका सांसद राजभक्त श्रेष्ठले नेपाली अर्थतन्त्रमा गाँजाको वैधानिकताको सम्भावना र फाइदाबारे प्रकाश पारे । उद्यमी इशा क्षेत्रीले एक युवा उद्यमी र गाँजा वैधानिकीकरण युवा संलग्नताको महत्त्वलाई प्रकाश पारिन् । क्षेत्रीले व्यापक रूपमा युवाहरूको अनुभव र रचनात्मकताको सम्भावनालाई बेवास्ता गर्न नहुने बताइन् । 

त्यस्तै नेता राजीव काफ्लेले व्यापक जन असन्तुष्टिको बाबजुद साहसपूर्वक आन्दोलनको नेतृत्व गरेकोमा प्रशंसा गरे । कार्यक्रममा नीति निर्माता, शिक्षाविद्, कार्यकर्ता र विभिन्न क्षेत्रका प्रतिनिधिहरू लगायत विभिन्न सरोकारवालाहरूले सहभागिता जनाएका थिए । जसले यसलाई संवाद र विचार आदानप्रदानको लागि एक व्यापक मञ्च बनाएको थियो ।