चिकित्सक संघको तेस्रो राष्ट्रिय स्वास्थ्य शिखर सम्मेलन अनिश्चितकालसम्म स्थगित

काठमाडौं । नेपाल चिकित्सक संघको तेस्रो राष्ट्रिय स्वास्थ्य शिखर सम्मेलन अनिश्चितकालसम्म स्थगित भएको छ । संघले आज एक प्रेस सूचना निकाल्दै असोज १२ र १३ गते हुने भनिएको उक्त सम्मेलन विशेष कारणबस स्थगित भएको जनाएको छ ।

‘विशेष कारणबस २०८० असोज १२ र १३ गते हुने भनिएको नेपाल चिकित्सक संघको तेस्रो राष्ट्रिय स्वास्थ्य शिखर सम्मेलन हाललाई अर्को सूचना जारी नभएसम्मका लागि स्थगित गरिएको व्यहोरा सम्बन्धित सबैमा सूचित गरिन्छ ।’, संघको सूचनामा उल्लेख छ । भोलिदेखि सुरु हुने दुई दिने तेस्रो राष्ट्रिय स्वास्थ्य शिखर सम्मेलन संघले के कारणले स्थगित गरेको हो त्यो भने खुलाएको छैन ।

यसबाट पर्न गएको असुविधाप्रति संघले क्षमा याचना समेत गरेको छ । स्थगित भएको उक्त राष्ट्रिय स्वास्थ्य शिखर सम्मेलन निकट भविष्यमै तय गरिने समेत संघका महासचिव डा. सन्जिव तिवारीद्वारा हस्ताक्षरित सूचना जनाइएको छ ।