अदालतले पनि सचिव नबनाएपछि सङ्गीताको विकल्प राजीनामा!

काठमाडौँ ।  सरकारले स्वास्थ्य सचिव नबनाएपछि अदालतको शरणमा पुगेकी स्वास्थ्य मन्त्रालयकी अतिरिक्त सचिव डा. सङ्गीता कौशल मिश्राको बाटो त्यहाँबाट पनि बन्द भएको छ। नियम अनुसार एक सचिवका लागि तीन जना सिनियर कर्मचारीको नाम सिफारिस हुने कानुनी व्यवस्था रहेको छ। सोही अनुसार लोकसेवा आयोगले तीन जनाको नाम सिफारिस गरेको थियो। उक्त सिफारिसका आधारमा सरकारले डा. विकास देवकोटालाई सचिवमा नियुक्त गरेको थियो। डा. मिश्रासँगै देवकोटा र डा. टङ्क बाराकोटीको नाम बढुवा समितिले मन्त्रिपरिषद्मा पठाएको थियो । 

१२ तह बढुवामा मिश्रा देवकोटा र बाराकोटीभन्दा केही वर्ष अगाडि बढुवा भएकी हुन्। तर, तीन जनाको नाम सिफारिस गर्दा उनीहरूमध्ये जो बनाएपनि योग्य भएको बुझिन्छ। सरकारले आफूलाई सचिवमा बढुवा नगरेर डा. देवकोटालाई गरेको भन्दै उनले अदालतको ढोका चहारेकी थिइन्। तर, बुधबार अदालतले उनको पक्षमा आदेश नदिएर ढोका बन्द गरेपछि न्यायालयबाट सचिव हुने सङ्गीताको दिवासपना सिसाझैँ फुटेको छ। 

सङ्गीतासँग अब एउटा मात्रै विकल्प छ। उनले सरकारी सेवाबाट बाहिरिनु नै उत्तम हुने छ। हुन त उनी आफूबाहेक अरु माथिल्लो पदमा पुग्नु हुँदैन भन्ने सोच पुरानै हो। स्वास्थ्य सेवा विभागको महानिर्देशक हुँदा हितैसी साथीलाई हटाएर स्वास्थ्य मन्त्रीस्तरीय निर्णयबाट नियुक्ति खाएकी थिइन्। तर, सोही अनुसार उनलाई हटाएर अर्को हितैसी साथी महानिर्देशक बन्दा मन्त्रीस्तरीय निर्णयले हुँदैन मन्त्रिपरिषद्ले गर्नुपर्ने भन्दै लफडा गरेकी थिइन्। जे होस् उनको बाँकी जीवन खुसी साथ बितोस् शुभकामना!