तीनकुने घटनामा गृहमन्त्रीको राजीनामा र न्यायिक छानबिन समिति बनाउन राप्रपाको माग

काठमाडौं। राष्ट्रिय प्रजातन्त्र पार्टी (राप्रपा)ले गत चैत १५ गते तीनकुने र आसपासमा भएको घटनामा गृहमन्त्री रमेश लेखकको राजीनामा मागेको छ। कार्यवाहक प्रधानमन्त्री प्रकाशमान सिंहलाई ज्ञापनपत्र बुझाउँदै तीनकुने घटनामा गृहमन्त्रीको राजीनामा मागेको हो। त्यस्तै उक्त घटनामा न्यायिक छानबिन समिति बनाउन राप्रपाको माग गरेको छ।

राप्रपाका अध्यक्ष राजेन्द्र लिङ्देनको नेतृत्वमा गएको राप्रपाको प्रतिनिधिमण्डलले कार्यवाहक प्रधानमन्त्री सिंहलाई भेटेर तीनकुने छानबिनका लागि गृहमन्त्रीको राजीनाका साथै दमनमा नेतृत्व गर्ने प्रहरी प्रमुख र प्रशासनिक नेतृत्वको निलम्बन गरिनुपर्ने माग गरेको छ। राप्रपाले तीनकुने र आसपासका क्षेत्रमा भएको घटना लगायतका विषयमा सरकारको गम्भीर ध्यानाकर्षण गराएको हो। सर्वोच्च अदालतका पूर्व न्यायाधीशको अध्यक्षतामा मानवअधिकार आयोग, नागरिक समाज सम्मिलित स्वतन्त्र छानबिन आयोग गठन हुनुपर्ने राप्रपाको माग छ।

तीनकुने घटनाका मृतकहरुलाई शहीद घोषणा गरिनुपर्ने र घाइतेहरुको नि:शुल्क र प्रभावकारी उपचारको व्यवस्था गरिनुपर्ने पनि राप्रपाको माग छ। त्यस्तै राप्रपा नेताहरु रबीन्द्र मिश्र र डा. धवल शमसेर राणा लगायत अन्य बन्दीहरुको रिहाई गर्न समेत राप्रपाले सरकारको ध्यानाकर्षण गराएको हो।