बजेट बनाउने समयमा २ प्रतिष्ठान उपकुलपतिविहीन, कार्यवाहक उपकुलपति पनि तोकिएन

काठमाडौं । आगामी आर्थिक वर्षको बजेट बनाउन जुट्ने समयमा देशका दुई प्रतिष्ठान उपकुलपतिविहीन बनेका छन्। कर्णाली स्वास्थ्य विज्ञान प्रतिष्ठान र पोखरा स्वास्थ्य विज्ञान प्रतिष्ठानका उपकुलपतिको चार वर्षे कार्यकाल सकिएसँगै उपकुलपतिविहीन बनेका हुन्। तर कुलपति र सहकुलपतिले भने कार्यवाहक उपकुलपतिको जिम्मेवारी कसैलाई तोकेका छैनन्। बजेट बनाउने समयमा प्रतिष्ठान नेतृत्वविहीन बन्दा गम्भीर समस्या आउने अधिकारीहरु बताउँछन्।

स्वास्थ्य तथा जनसंख्यामन्त्री प्रदीप पौडेलले कार्यवाहक उपकुलपति तोक्नुपर्नेमा कानमा तेल हालेर बसेका छन् वा आर्थिक लेनदेनको लाेभमा कार्यवाहक उपकुलपति ताेक्न हिच्किचाएको हुन सक्छ।

कर्णाली स्वास्थ्य विज्ञान प्रतिष्ठानका उपकुलपति डा. मंगल रावल र पोखरा स्वास्थ्य विज्ञान प्रतिष्ठानका उपकुलपति डा. डुकबहादुर क्षेत्रीको कार्यकाल सकिएको छ। २०७७ चैत २२ गते तत्कालीन प्रधानमन्त्री केपी शर्मा ओलीले दुवै जनालाई उपकुलपतिमा नियुक्त गरेका थिए। अहिले पनि उनै कुलपति प्रधानमन्त्रीका रुपमा रहेका छन्।

प्रधानमन्त्री विदेश भ्रमणमा रहेको वेला सहकुलपति रहेका स्वास्थ्य मन्त्रीले निर्णय गर्न सकेका छैनन। स्वास्थ्यमन्त्री पौडेल आफ्नो क्षमता र योग्यता नभएका कारणले यस्ता निर्णय गर्न समयमा सक्दैनन्। हरेक निर्णयमा परनिर्भर बन्नुपर्ने बाध्यताका कारण पनि स्वास्थ्य क्षेत्रमा हुने गरेका नियुक्ति सरुवा र बढुवा जस्ता विषयमा समस्या आउने गरेको छ।

उपकुलपति वाहेक डीन र डाइरेक्टर मात्र पदाधिकारी रहेका पोखरा स्वास्थ्य विज्ञान प्रतिष्ठानमा कामु उपकुलपति कसैलाई नदिँदा समस्या आउने देखिएको छ। कार्यकारी अधिकारसहित आर्थिक अधिकार उपकुलपति र रजिस्ट्रारमा निहित रहेको कर्णाली स्वास्थ्य विज्ञान प्रतिष्ठानमा पनि समस्या आउन सक्ने विज्ञहरु वताउँछन्।