पहुँचवाला उपसचिव सिडिओलाई किस्ताबन्दीमा झिक्दै, सहसचिव हेरेको हेरै

काठमाडौं। गृह मन्त्रालयले सहसचिवको दरबन्दीमा गएका पहुँचवाला उपसचिव सिडिओलाई किस्ताबन्दीमा चलाउन थालेको छ। गृहको बरण्डा दर्जनौं सहसचिव हुँदा पनि उपसचिव सिडिओलाई किस्ताबन्दीमा मन्त्रालय फिर्ता ल्याएको हो।

चैतको पहिलो साता सहसचिवको दरबन्दीमा रहेका अछामका उपसचिव सिडिओ शिवप्रसाद लम्साललाई गृह मन्त्रालय तानेको थियो। अछाममा सहसचिव आनन्द सारूलाई पठाएर लम्साललाई गृह मन्त्रालय तानिएको थियो। शुक्रबार सहसचिवको दरबन्दीमा रहेका उपसचिव प्युठानको सिडिओ रमा आचार्य (सुवेदी) र अर्घाखाँचीका सिडिओ बाबुराम अर्याललाई गृह मन्त्रालय तानेर त्यहाँ सहसचिव पठाइएको हो। अर्घाखाँचीको सिडिओमा जगेडामा रहेका वेदप्रसाद खरेल र सिडिओमा सहसचिव दिपकराज नेपाललाई पठाइएको हो।

गृहले सहसचिवको दरबन्दीमा रहेका उपसचिव सिडिओलाई किस्ताबन्दीमा चलाउँदा रामेछाप, दैलेख, जुम्ला, सल्यान, बैतडी, डडेलधुरा, र डोटीका सिडिओ अझै जमेर बसेका छन्।रामेछापका राजुप्रसाद पौडेल, दैलेखका नवराज जैसी, जुम्लाका रामबहादुर शाही, सल्यानका सावित्रा पुन, बैतडीका दिर्घराज उपाध्याय, डडेलधुराका चोमेन्द्र न्यौपाने र डोटीका मोहनराज जोशी सहसचिवको दरबन्दीमा रहेका उपसचिव सिडिओ हुन्। उनीहरू निकै शक्तिशाली देखिएका छन्। गृहमा ठूलो संख्यामा सहसचिव बरन्डामा घुमिरहेपनि उपसचिवले नै सिडिओ बनेर मस्ती मारिरहेका छन्। गृहमन्त्री रमेश लेखक र सचिव गोकर्णमणि दुवाडी सहसचिवको दरबन्दीमा भएका उपसचिव सिडिओका अगाडि निरीह देखिएका हुन्।