चितवनमा प्रधानमन्त्रीको पुत्ला जल्दा सिडिओ तानिए, तीनकुनेमा घर जल्दा र मान्छे ढल्दा पनि उन्मुक्ति

काठमाडौं। सहकारी ठगी प्रकरणमा राष्ट्रिय स्वतन्त्र पार्टीका अध्यक्ष एवं पूर्वगृहमन्त्री रवि लामिछाने पक्राउ परेपछि तत्कालीन चितवनका सिडिओ इन्द्रदेव यादव गृह मन्त्रालय तानिए। रविका कार्यकर्ताहरूले उनी पक्राउ परेपछि त्यसको विरोधमा प्रधानमन्त्री केपी शर्मा ओलीको पुतला बनाएर नारायणी नदीमा दाहसंस्कार गरेका थिए। त्यहीँ प्रकरणमा सिडिओ फेरिए।

प्रधानमन्त्रीको पुत्ला जलाउँदा पनि रोक्न नसकेको भन्दै गृहमन्त्री रमेश लेखकले सिडिओ यादवलाई मन्त्रालय तानेका थिए। प्रधानमन्त्रीको पुत्ला चलाउँदा रमिते बन्ने सिडिओ यादवलाई गृहमन्त्री लेखकले ‘बहादुरीपूर्वक’ मन्त्रालय तानेर चितवनमा प्रकाश पौडेललाई पठाइयो। यद्यपि गृहमन्त्री लेखक आफ्नै निर्णयलाई गलत सावित गर्दै यादवलाई केही समयपछि नै चितवनभन्दा आकर्षक जिल्ला मोरङको सिडिओ बनाएर पठाए। गृहमन्त्रीले जवाफदेहिता देखाउन चाहेनन्। प्रधानमन्त्रीको पुत्ला दहन प्रकरणमा चितवनका एसपी भावेश रिमाल पनि प्रहरी प्रधान कार्यालयमा तानिएका थिए।

गृहमन्त्री लेखकले यहीँ चैतमा दलित परिवारको घर भत्काइएको घटनामा सिराहाका सिडिओ बासुदेव दाहाल मन्त्रालय तानेका थिए। महायज्ञ गर्ने नाममा औरही गाउँपालिका वडा नम्बर ५ मा दीपक मल्लिकको घर भत्काइएको घटनामा सिडिओ दाहाललाई मन्त्रालय तानिएको हो। उक्त घटनामा हेलचक्र्याइँ गरेको भन्दै सिराहाका सिडिओ बासुदेव दाहाल मन्त्रालय तानेर विश्वप्रकाश अर्याललाई पठाइयो। सिडिओ मात्र तानिएको भनेर गृहमन्त्रीको आलोचना भएपछि सिराहाका एसपी रमेश पण्डित पनि केही दिनपछि फिर्ता बोलाइए।

सामान्य प्रकरणमा चितवन र सिराहाका सिडिओ फिर्ता बोलाउने गृहमन्त्री लेखकले गत १५ गते तीनकुने भएको गम्भीर प्रकृतिको घटनामा अहिलेसम्म कुनै एक्सन लिएका छैनन्। चितवन र सिराहाभन्दा गम्भीर चुक भएको तीनकुने घटनामा गृहमन्त्री लेखकले काठमाडौं सिडिओ ऋषिराम तिवारीलाई अहिलेसम्म मन्त्रालय तान्ने हिम्मत नगरेका हुन्। तीनकुनेमा घर र मान्छे जल्दा तथा निहत्था नागरिक प्रहरीको गोली लागेर सडकमा ढल्दा पनि सिडिओ तिवारीलाई अहिलेसम्म तानेका छैनन्।

राजावादीहरूले गरेको शक्ति प्रदर्शनमा १५ गते तीनकुनेमा ठूलो जनधनको क्षति भयो। घर नै जल्यो। तीनकुनेमा घर जल्दा एभिन्यूज टेलिभिजनका पत्रकार सुरेश रजकको ज्यान गयो। प्रहरीले हानेको गोली लागेर कीर्तिपुरका सविन महर्जनको निधन भयो। प्रहरीको गोली लागेर दर्जनौं निहत्था नागरिक घाइते भए। दर्जनौं गाडी जले। उदण्ड स्वभावका दुर्गा प्रसाईंले प्रहरीको सुरक्षाघेरा तोडेर गाडी हुईक्याउदा पनि सहजै उम्किए। कोटेश्वरको भाटभटेनी सुपरमार्केटमा लुटपाट मच्चियो। जडीबुटी उत्पादन तथा प्रशोधन कम्पनी लिमिटेडको भवन जलाइयो। पार्किङमा रहेका आधा दर्जन बढी गाडी जले। उक्त प्रकरण गृह प्रशासन निकम्मा देखियो। तीनकुने घटनामा नयाँ-नयाँ रहस्य बाहिर आइरहँदा गृहमन्त्री लेखक न्यायिक छानबिन समिति बनाउन तयार देखिँदैनन्। त्यति मात्र होइन कमजोर कमाण्ड भएका काठमाडौंको सिडिओ र एसएसपीको जिम्मेवारी खोस्न समेत उनी असफल देखिएका छन्। यसलाई सुरक्षाविद्हरूले गृहमन्त्री लेखकको अकर्मण्यताको रूपमा टिप्पणी गरेका छन्।

एक वर्ष अगाडि मात्र २ जनाको ज्यान जानेगरी ललितपुरको बालकुमारी गोली काण्डमा ललितपुरका सिडिओ रूद्रप्रसाद पण्डित र एसएसपी सिद्धिबिक्रम राणा तानिएका थिए। दक्षिण कोरिया जाने रोजगारी अनुमति प्रणाली(ईपीएस)को परीक्षा दिन पाउनुपर्ने माग राखेर भएको प्रदर्शनमा गोली चल्दा तत्कालीन सिडिओ पण्डित गृह मन्त्रालय तानिएका थिए। त्यस्तै उक्त प्रकरणमा एसपी पनि प्रहरी प्रधान कार्यालय तानिए। ललितपुर बालकुमारीभन्दा कयौं गुना ठूलो तीनकुने र आसपासको क्षेत्रमा घटना र क्षति हुँदा पनि काठमाडौं सिडिओ ऋषिराम तिवारी र एसएसपी विश्व अधिकारी जिम्मेवारीमै छन्। उक्त घटनामा गृहमन्त्री लेखकले नैतिक जिम्मेवारी लिएर तत्काल सिडिओ र एसएसपी तान्नु पर्नेमा अकर्मण्यता देखाइरहेका छन्। यसले गृह प्रशासन कति कमजोर र लाचार छ भन्ने कुरा प्रस्ट देखिन्छ।