चन्द्रागिरी र दक्षिणकालीद्वारा संघीय सरकारले पठाएको प्रमुख प्रशासकीय अधिकृत अस्वीकार

काठमाडौं। नेपाली कांग्रेस जितेका काठमाडौंका चन्द्रागिरी र दक्षिणकाली नगरपालिकाले संघीय सरकारले पठाएको प्रमुख प्रशासकीय अधिकृत अस्वीकार गरेको छ। संघीय मामिला तथा सामान्य प्रशासन मन्त्रालयले सरूवा गरेर पठाएका प्रमुख प्रशासकीय अधिकृतलाई काठमाडौंका चन्द्रागिरी र दक्षिणकाली नगरपालिकाले अस्वीकार गरिदिएको हो।

चन्द्रागिरीका प्रमुख प्रशासकीय अधिकृत हेमराज अर्याल र दक्षिणकालीका रोशन ज्ञवाली आन्तरिक प्रतिस्पर्धाबाट सहसचिव भएपछि भुवनेश्वर लामिछाने र रामप्रसाद आचार्यलाई पठाएको थियो। संघीय मामिला तथा सामान्य प्रशासन मन्त्रालयका उपसचिव लामिछानेलाई चन्द्रागिरी र पनौती नगरपालिकाका प्रमुख प्रशासकीय अधिकृत आचार्यलाई दक्षिणका पठाइएको थियो। तर, चन्द्रगिरी र दक्षिणकालीले संघीय सरकारले पठाएका प्रमुख प्रशासकीय अधिकृतलाई हाजिर नै गराउन नमानेका हुन्।

चन्द्रागिरीमा कांग्रेसका घनश्याम गिरी र दक्षिणकालीमा कांग्रेस कै मोहन बस्नेत मेयर छन्। चन्द्रागिरीले लामिछानेलाई हाजिर नगराई सुरेन्द्र थापा मगरलाई प्रमुख प्रशासकीय अधिकृतमा लगेको छ। त्यस्तै दक्षिणकालीमा पनि आचार्यलाई हाजिर नगराई भर्खरै उपसचिवमा बढुवा भएका राममणि काफ्लेलाई प्रमुख प्रशासकीय अधिकृत बनाएर लगेको हो।

काठमाडौं महानगरपालिकाको प्रमुख प्रशासकीय अधिकृतमा विवादित सरोजप्रसाद गुरागाईंलाई मेयरलाई पेलेर जबरजस्ती हाजिर गराएको संघीय सरकारले कांग्रेसले जितेका नगरपालिकामा भने रोजै कै प्रमुख प्रशासकीय अधिकृत पठाइदिएको छ। बालेनलाई पेल्ने संघीय सरकारले घनश्याम र मोहनलाई खेल्न दिएको हो।