अख्तियारबाट आएका ३ सहसचिवले सिडिओको जिम्मेवारी पाए

काठमाडौं। गृह मन्त्रालयले अख्तियार दुरूपयोग अनुसन्धान आयोगबाट आएका तीनै जना सहसचिवलाई प्रमुख जिल्ला अधिकारी (सिडिओ)को जिम्मेवारी दिएको छ। अख्तियारबाट गृह प्रवेश गरेका सहसचिवहरू नरहरी घिमिरे, ईश्वरी प्रसाद अर्याल, माधवप्रसाद पोखरेलले सिडिओको जिम्मेवारी पाइसकेका छन्।

घिमिरे पहिलो ‘लट’को सरूवामा खोटाङको सिडिओ भएर गएका हुन्। पछिल्लो ‘लट’मा अर्याल र पोखरेललाई सिडिओ बनाएर पठाइएको छ। गृह मन्त्रालयले अर्याललाई स्याङ्जाको सिडिओ र पोखरेललाईरेललाई लमजुङ्ग सिडिओ बनाएर पठाएको छ।

२०८० पुष १६ गतेदेखि सिडिओको जिम्मेवारी सम्हालेकी सुनिता नेपाललाई गृह मन्त्रालय तानेर अर्याललाई स्याङजा पठाइएको हो। सामान्यतः १ महिना र १ वर्षमा सिडिओ सरूवा गरिदै आएको छ। नेपालले भने १५ महिनासम्म सिडिओ चलाउन पाएकी हुन्।

बुद्धबहादुर गुरूङले सिडिओमा २०८० चैत ८ गते लमजुङ्गको सिडिओमा हाजिर भएका थिए। गुरुङलाई विस्थापित गरेर पोखरेल सिडिओ भएर गएका हुन्। अख्तियारबाट आएका सहसचिवहरू आकर्षक र तराईका जिल्लाको सिडिओ बनाइँदै आएको थियो। यसपटक भने ‘सिन’ फेरिएको छ। अख्तियारबाट आएका तीनै जना सहसचिवले मध्यम खालको जिल्लाको कमाण्ड भेटेका छन्।