गण्डकी प्रदेशका तीन सांसदलाई कोरोना संक्रमण, अविश्वासको प्रस्तावमा मत हाल्ने व्यवस्था मिलाइने
कास्की : गण्डकी प्रदेशका तीन जना सांसदलाई कोरोना भाइरस संक्रमण पुष्टि भएको छ ।
कोरोना संक्रमित हुनेमा सत्तारुढ दल नेकपा एमाले सांसद राजिव पहारी, प्रभा कोइराला र नेपाली कांग्रेस सांसद मनकुमारी गुरुङ रहेका छन् ।
मंगलबार सबै सांसदको स्वाव संकलन गरिएकोमा बुधबार बिहान रिपोर्ट आएको हो ।
मंगलबारको प्रदेश सभा बैठकमा एमाले सांसदले कोरोना परीक्षण नगरी सदन सञ्चालन नगर्न माग गर्दै बैठक अवरुद्ध गरेका थिए ।
एमाले सांसदको माग अनुसार सबै सांसदको कोरोना परीक्षण गरिएको हो ।
विशेष अधिवेशनमा मुख्यमन्त्री पृथ्वीसुब्बा गुरुङविरुद्ध दर्ता भएको अविश्वास प्रस्तावमाथि छलफल गर्ने कार्यक्रम थियो ।
आज दिउँसो बस्ने सदनमा अविश्वासको प्रस्तावमाथि मतदान हुने कार्यसूची रहेको छ ।
कोरोना संक्रमित भएका सांसदलाई पनि मतदानको व्यवस्था गरिएको प्रदेश सभा सचिवालयले जनाएको छ ।
मुख्यमन्त्री गुरुङविरुद्ध कांग्रेस, माओवादी केन्द्र र जसपाले संयुक्त रुपमा अविश्वासको प्रस्ताव दर्ता गरेका हुन् ।
अविश्वासको प्रस्तावमा राष्टिय जनमोर्चाको पनि समर्थन रहेको छ ।
चार वटै दलले विपक्षमा मतदान गरे गुरुङको पद गुम्ने निश्चित छ ।
सरकारले प्रलोभनमा पारेर फ्लोर क्रस हुने आशंका गर्दै विपक्षी दलका सांसदहरु गएराति होटलमै बसेका थिए ।
क्याटेगोरी : समाचारट्याग : #पृथ्वीसुब्बा गुरुङ
तपाईको प्रतिक्रिया दिनुहोस