इनरुवा अस्पताललाई बेहाल पार्ने पूर्व मेयर मेहताले गाडी-टिभी घर लगेको आरोप

काठमाडौं । सुनसरीको सदरमुकामस्थित इनरुवा अस्पताललाई बेहाल पार्ने इनरुवा नगरपालिकाका पूर्व मेयर राजन मेहताले गाडी, मोटरसाइकल टिभीलगायतका सामान घर लगेको आरोप लागेको छ ।

हाल जिल्ला समन्वय समिति सुनसरीको प्रमुखमा निर्वाचत भएका मेहताले लगेको बा १ झ ८८२३ नम्बरकाे सेन्ट्राे कार, ४८ इन्चकाे टेलिभिजन, नागरिक वडापत्रकाे ४८ इन्चकाे एलइडि डिसप्ले नयाँ माेडलकाे साेफा सेट, ल्यापटप २ थान, माेटरसाईकल ३ थान, स्कुटी १ थानलगायतका अन्य सामान लगेको आरोप लागेको हो ।

‘भ्वाइस अफ इनरुवा’ले पनि इनरुवा नगरपालिकाका पूर्व मेयर तथा जिल्ला समन्वय समिति सुनसरीका प्रमुख मेहताले आफू पदमा रहँदा घर लगेका उक्त समानहरूको फिर्ता नगरेको उल्लेख गरेको छ । तर जिन्सी शाखा प्रमुख सूर्य नेपालले बाहिर आएजस्तो सबै सामान लगेको कुरा गलत भएको दाबी गरे । टिभी मर्मत गर्न लगेको र मोटरसाइकलका केही सामान फिर्ता आउन बाँकी रहेको स्वीकार्दै उनले यो विषय मेहतालाई जानकारी गराइएको बताए ।

जिल्ला समन्वय समितिको प्रमुख भइसकेपछि पनि सामानहरू फिर्ता नहुनुमा मेहताको बदमासी देखिन्छ । उनको पालामा इनरुवा नगरपालिकाका सबैभन्दा बढी अनियमितता भएको आरोप लाग्दै आएको छ । शिक्षाको कर्मचारीलाई कार्यकारी अधिकार दिएर इनरुवा नगरपालिकामा व्यापक अनियमितता गरेको आरोप लाग्दै आएपनि अहिलेसम्म अख्तियार दुरूपयोग अनुसन्धान आयोगको आँखा परेको छैन ।