राजकीय सम्मानका साथ संविधानसभा अध्यक्ष नेम्वाङको अन्त्येष्टि

काठमाडौं । संविधानसभा अध्यक्ष सुवासचन्द्र नेम्वाङको राजकीय सम्मानका साथ अन्त्येष्टि गरिएको छ । उनको पार्थिव शरीरलाई बिहीबार पशुपति आर्यघाटमा राजकीय सम्मानका साथ अन्त्येष्टि गरिएको हो ।

प्रधानमन्त्री पुष्पकमल दाहालले पशुपति आर्यघाटमा नेम्वाङको पार्थिव शरीरमा नेपालको राष्ट्रिय झण्डा र पुष्पगुच्छा चढाएर अन्तिम श्रद्धाञ्जली अर्पण गर्दै अन्तिम बिदाइ गरेका छन् ।एमाले उपाध्यक्ष समेत रहेका उनको पार्थिव शरीरमा एमाले अध्यक्ष केपी शर्मा ओलीले पार्टीको झण्डा ओढाए श्रद्धाञ्जली अर्पण गरेका थिए।

नेम्वाङको पार्थिव शरीरमा उनका दुई छोरा मिङ्सो र सुहाङ नेम्वाङले दागबत्ती दिएका छन् । राजकीय सम्मानस्वरुप नेपाल सेनाको टुकडीले अन्तिम सलामी दिएको हो । अन्त्येष्टिमा नेपाल सरकारका मन्त्रीहरू,राजनीतिक दलका शीर्ष नेताहरू, आफन्त, परिवारजन तथा शुभचिन्तकहरूको बाक्लो उपस्थिति रहेको थियो । सरकारले नेम्वाङको निधनको शोकमा सार्वजनिक बिदा समेत दिएको छ ।