कामपा उपप्रमुख डंगोलसँग स्वीस प्रतिनिधि मण्डलको शिष्टाचार भेट 

काठमाडौं । काठमाडौं महानगरपालिकाकी उपप्रमुख सुनिता डंगोलले, बजारमा माग भएका जनशक्ति उत्पादन गर्न सिपमूलक तालिम सञ्चालन गरिरहेको बताएइन् । मंगलबार शिष्टाचार भेटका लागि आएका स्वीस एजेन्सी फर डिभलपमेन्ट एण्ड कोअपरेसन (एसडीसी) का दक्षिण एशिया क्षेत्रका प्रमुख सबिन रोसेन्थेलर, नेपालका लागि स्वीजरल्याण्डकी राजदूत डेनिल मेउलीसहितको प्रतिनिधि मण्डलसँग छलफलका क्रममा उहाँले, बेरोजगार व्यक्ति र रोजगारदाताबिचको खाडलका सन्दर्भमा यस्तो बताएकी हुन् ।

‘महानगरपालिकाले सामाजिक विकासका क्षेत्रलाई भौतिक विकास जत्तिकै महत्व दिएको छ ।’ उनले प्रतिनिधि मण्डलले विद्यालयलाई बालमैत्री बनाउन कस्ता प्रयास गरिएका छन्, भन्ने प्रश्नको जवाफमा भनिन्, ‘सामुदायिक विद्यालयका शिक्षकहरुका लागि करिअर गाइड, करिअर म्यापिङ, मनोवैज्ञानिक र मनोसामाजिक परामर्शको तालिम चलिरहेका छन् । यसबाट शिक्षकहरुमा बालमैत्री व्यवहार सम्बन्धी आचरण वढ्दै जाने अपेक्षा गरेका छौँ ।’

एक वडा एक उद्यम कार्यक्रमका बारेमा जानकारी दिँदै उपप्रमुख डंगोलले, स्थानीय उत्पादनमा पैसा बोक्ने थैली र सेरामिक्सको चिया खाने भाँडाका विषयमा जानकारी दिइन् ।महानगरपालिकाले संघ सरकार र आन्तरिक गरी श्रम र रोजगारसँग सम्बन्धित २ प्रकारका कायृक्रम सञ्चालन गरिरहेको छ । छलफलका क्रममा प्रमुख प्रशासकीय अधिकृत प्रदीप परियारले भने, ‘काठमाडौं संघीय राजधानी सहर भएकोले देशभरिबाट रोजगारका लागि मानिसहरु आउने गरेका छन् । यसकारण काठमाडौँसँग उद्योग तथा रोजगारीका क्षेत्रमा जनशक्ति उपलब्ध गराउन सक्ने सम्भावना छ । यसलाई व्यवस्थित गर्न श्रम वैङ्कमा सूचीकृत हुने प्रणाली विकास गरिएको छ । यससँगै प्रधानमन्त्री रोजगार कार्यक्रममा पनि सूचीकृत हुन सक्ने व्यवस्था गरिएको छ ।’

भेटका क्रममा एशिया क्षेत्रका प्रमुख रोसेन्थेलरले, श्रम बजारमा आवश्यक जनशक्ति पूर्ति गरिने प्रणालीका विषयमा जिज्ञासा राखे । वेरोजगारी समस्या समाधान गर्न महानगरपालिकाले के के गर्न सक्छ, महानगरपालिकाले गरेका निर्णयले कहाँसम्म प्रभाव राख्न सक्छ? जान्न रुचि भएको बताए।

राजदूत मेउलीको पनि महानगरपालिकाले सञ्चालन गरेको बुक फ्री फ्राइडे कार्यक्रमको प्रशंशा गर्दै यसको दिगोपनाका लागि तर्जुमा गरिएका योजनाका विषयमा जिज्ञासा थियो  ।  प्रतिनिधिमण्डलका सदस्यहरुले सिपमूलक तालिम महानगरपालिका आफैँले सञ्चालन गर्ने हो कि, अन्य सरकारी, गैरसरकारी वा निजी क्षेत्रसँग सहकार्य गर्नुहुन्छ? साझदारीको सम्भावना कस्तो छ? जस्ता प्रश्न राखेका थियो ।  उत्तरमा अधिकारीहरुले, व्यावसायिक सिपमूलक तालिम प्रदान गर्ने सरकारी, गैरसरकारी, उद्योग वाणिज्य तथा व्यावसायिक क्षेत्रसँग सहकार्य भएको बताए ।

छलफलपछि प्रमुख प्रशासकीय अधिकृत परियारले, प्रतिनिधि मण्डललाई रोजगार सेवा केन्द्र, श्रम वैङ्क, प्रधानमन्त्री रोजगार कार्यक्रमको अवलोकन गराएका थिए । सेवा केन्द्रमा कसरी काम हुन्छ, श्रमिक कसरी सूचीकृत हुन्छन्, सूचीकृतले रोजगारी कसरी पाउँछन्? अवलोकनका क्रममा प्रतिनिधि मण्डलले जिज्ञासा राखेका थियो ।

रोजगार संयोजक रश्मि राईका अनुसार महानगरपालिकाको श्रम वैङ्क र प्रधानमन्त्री रोजगार कार्यक्रमअन्तर्गत ४० जना अपाङ्गता भएका व्यक्तिसहित करिब ३ हजार २ सय श्रमिक सूचीकृत भएका छन् । उनीहरुमध्ये करिब ७ सय व्यक्तिले रोजगारी पाउनुभएको छ । उनीहरुमध्ये २० जना अपाङ्गता भएका व्यक्ति रहेका छन्।