डा. ओम मूर्ति अनिलद्वारा २० लाखको छात्रवृत्ति घोषणा

काठमाडौं। चर्चित मुटुरोग विशेषज्ञ डा. ओम मूर्ति अनिलले २० लाख रुपैयाँ बराबरको छात्रवृत्ति घोषणा गरेका छन्। उक्त छात्रवृत्ति रकम उनीद्वारा लिखित पुस्तक ‘जीवन्त सम्बन्ध’को बिक्रीबाट प्राप्त भएको जनाइएको छ। । अनिलले स्थापना गरेको ‘डा. ओम फाउन्डेसन’ले उक्त छात्रवृत्ति कोष स्थापना गरेको हो।

उक्त छात्रवृत्ति सरकारी विद्यालयमा अध्ययनरत विद्यार्थीलको शिक्षामा योगदान पुऱ्याउनका निम्ति छुट्टाएको डा. अनिलले पत्रकार सम्मेलनमार्फत जानकारी दिए। जीवन्त सम्बन्ध पुस्तकका पाठकहरूबाट प्राप्त रकम गरिब तथा जेहेन्दार विद्यार्थीको शिक्षामा खर्च गर्न पाउँदा लागेको उनको भनाई छ। 

छात्रवृत्तिका लागि माघ १६ गतेदेखि फागुन ४ गतेसम्म कक्षा ६ देखि कक्षा ९ सम्मका विद्यार्थीसँग देशैभरीबाट आवेदन माग गरिने फाउन्डेसनले पत्रकार सम्मेलन मार्फत जानकारी दिएको छ । उक्त छात्रवृत्तिमा सहभागी हुन फाउन्डेसनको वेबसाइट www.dromfoundation.com मा रहेको ‘छात्रवृत्ति फारम’ भरेर आवेदन दिन सकिने छ । प्राप्त आवेदनलाई फाउन्डेसनले यकिन गरेर अन्तिम नामवली तयार गरेर प्राथमिकताका आधार छात्रवृत्ति वितरण गरिने फाउन्डेसनले जनाएको छ ।

फाउन्डेसनका अनुसार छनोट भएका विद्यार्थीसँग सम्पर्क गरी छात्रवृत्तिको रकम विद्यार्थी स्वयम्को बैंक खाता वा अभिभावकको खातामा सिधैं जम्मा गरिदिने छ। छात्रवृत्ति प्राप्त गर्नका लागि विद्यार्थी स्वयम्, विद्यालय वा अभिभावकले आवेदन दिन फारम भर्न सक्नेछन्। तर, आवेदनसहित विद्यार्थीको अघिल्लो कक्षाको ग्रेडसिट, परिचयपत्र, तथा विद्यार्थीको शैक्षिकस्तरसम्बन्धी विद्यालयको सिफारिसलगायतका कागजात संलग्न गर्नुपर्ने फाउन्डेसनले जनाएको छ।